Duren Jatoan
MPOK Wati lagi gembira hatinye. Sambil selonjoran di atas bale, die ngipas-ngipas. Perlahan kedengeran, Mpok Wati bersenandung lagu Belas Kasih-nye almarhum M. Mashabi.
Lamat-lamat syair lagu ntu ngerasuk ke hati. “Kasihanilah daku / Mengharap belas kasihmu / Semenjak dahulu / Oh Dewi.. kasihanilah daku / Siang ku mengeluh / Malam aku meratap / Bimbang aku selalu / Pikiranku tak tetap / Di mana engkau berada..”
Mpok Wati nggak ngeh kalo lama-lama die ude nyanyi. Mpok Wati juga nggak ngeh kalo Bang Idrus ude ade di deketnye. Waktu nyanyiin syair, “..Bimbang aku selalu / Pikiranku tak tetap / Di mana engkau berada..” Bang Idrus spontan nyautin.
“Kenape bimbang, Wat.. Saye ade nikh di sini..”cletuk Bang Idrus.
Mpok Wati terkesiap.
“Ee.. Bang Idrus.. dateng kagak pake salam dulu..”ujar Mpok Wati.
“He he he.. kelupaan.. Wat.. Assalamuálaikum..” tanggap Bang Idrus.
“Wa’alaikum salam..”
“Tumben gini hari ude bisa selonjoran..”
“Begitu deh bang. Baru aje saye beberes.. Masakan sih ude komplit tuh.. Ade pindang bandeng tuh, Bang..”
“Boleh deh.. Siapen aje pindang bandeng ame nasi uduk deh.. Sambel jande-nye jangan lupa..”
“Sayur mertua juga ade tuh bang..”
“Ude.. pindang bandeng aje..”
Mpok Wati beringsut masuk ke dalem warung. Bang Idrus ngikutin., terus duduk di pojokan, tempat biase die makan ame Bang Zul dan Kyai Pendi.
Mpok Wati nyiapin pesenan Bang Idrus.
“Kambing gimane bang? Laris kagak?”
“Alhamdulillah Wat.. Lebaran haji taun ini, alhamdulillah. Temen-temen ade juga sih yang rada sempoyongan. Kayaknye daye beli masyarakat kite lagi nyungsep nikh..”
“Yang saye denger juga begitu bang. Harga-harga kagak turun, kemampuan ekonomi masyarakat belon naek-naek juga.”
Asisten Mpok Wati, si Fadil nganterin teh anget rasa sereh, terus naro di atas meja. Persis di depan Bang Idrus. Fadil mesem liat Bang Idrus.
“Romannye hati lagi mekar nikh Bang..”
“Begitu deh Dil..”
Fadil meninggalkan Bang Idrus, Mpok Wati nyamperin sambil naro makanan pesenan Bang Idrus. Ketika Wati mau kembali ke tempatnye, Bang Idrus berusaha nahan.
“Duduk dulu di sini kenape, Wat.. pan, warung masih sepi..,”ujar Bang Idrus. Wati ngabulin maonye Bang Idrus. Die duduk di kursi persis di depan Bang Idrus duduk. Matenye mandang Bang Idrus yang mulain nyantap masakan bikinannye.
Bangga hati Mpok Wati.., masakannye dimakan dengan lahap ame Bang Idrus.
“Wati ude denger hasil Rapat Pimpinan Bamus Betawi?”
“Ude Bang.. Saye bersyukur, Bamus ngusulin Mpok Sylvi jadi bakal calon wagub. Artinye, ade tuh perempuan Betawi yang pantes mimpin ibukota.”
“Wati kenape kagak nerusin maju di jalur independen?”
“Yah.. Bang Idrus kayak kagak tahu aje.. Kagak cukup syarat maju di jalur independen..”
“Menutur Wati gimane? Kire-kire masuk nggak Mpok Sylvi dilamar buat jadi wagubnye Sandiaga Uno?”
“InshaAllah Bang. Bukan mao ngecilin Bang Ipul nikh.., kayaknye kalo semua calon gubernur ame calon wakil gubernur batangan semue, kagak seru Bang..”
“Maksudnye?”
“Gimane mao seru kalo di poster-poster ame di kartu suare kagak ade sternye.. Perempuan kan bisa jadi ster bang..”
“Wati pikir, lelaki kagak beseter ape?”
“Beseter sih beseter bang, tapi cahayanye beda..”
Bang Idrus manggut-manggut. Die kagak mao ngedebat Wati. Ini bagian dari taktik die ngedeketin Mpok Wati.
Ngeliat aer minum Bang Idrus ude mulain tiris, Wati buru-buru ngambilin aer. Bang Idrus memandang Wati yang makin boto aje.
Begitu Wati balik nganterin tu aer, Bang Idrus spontan nanya.
“Menurut Wati ape yang kudu disodorin ame Mpok Silvy, supaye secara program, kagak kalah ame bakal calon petahana?”
“Banyak sih Bang. Yang pasti sih, musti ade program yang peduli ame jande dan anak yatim.”
Bang Idrus tersenyum. “Enak aje.. Kalo ade program jande, musti ade juga dong program dude..”
“Bang Idrus segitunye.. Kalo gitu kite usulin aje ade program dude jande. Umpamanye, duren jatoan atawa duda keren jande boto anti narkoba.”
“Usul cakep tuh Wat. Soalnye narkoba ude ngerusak ke mane-mane. Bandar-bandar narkoba ude ngeraksek ke segale penjuru. Mulai dari anak-anak sampe dukun yang nyaru jadi bintang pelem.”
“Bang Idrus bener. Kite kudu berantas tuh narkoba. Ngomong-ngomong kambing Bang Idrus kagak diempanin daon ganja kan?”
“Astaghfirulloh Wat.. Ntar kliyengan tuh kambing, kayak kliyengannye Ahok, lantaran Bang Ipul ame Mpok Sylvi ngikut fit and proper koalisi partai-partai yang berseberangan ame die..”
“Ah.. nggak usah diomongin Bang.. Saye, nyebut namenye aje kagak mao.. Apelagi die sempet ngancem-ngancem setop dana hibah buat Bamus Betawi.. Emang tuh duit, duit die..”
“Iye sih.. Tapi Bamus juga kudu mandiri. Jangan bergantung ame dana hibah pemda..”
Ketika keduenye lagi asyik ngobrol, ade yang ngucapin salam. Obrolan keduenye berenti, terus buru-buru nyambut tuh salam. Ternyata Kyai Pendi yang nongol ame Jamilah, ponakannye yang belon lama ngejande ditinggal mati ame lakinye.
Bang Pendi ame Jamilah langsung jalan ke pojokan tempat Bang Idrus. Terus mesen makanan. Mate Bang Idrus nyolong-nyolong pandangan ngeliat Jamilah. Mpok Wati ngelirik. Bang Idrus buru-buru ngerobah pandangan ke muka Kyai Pendi..
Nggak berape lama, dateng pelanggan susul menyusul sampe tuh warung penuh. Mpok Wati ame Fadil sibuk ngelayanin.. Bang Idrus cuman mesem, sambil ngelirik Mpok Wati.. |
