Mendingan di Warung Laen Aje

WARUNG Mpok Wati rada beda. Pembeli gak serame hari-hari kemaren. Bang Pendi masuk ke warung, terus nongkrong di tempat biasanye. Di pojokan bagian depan. Gak lama kemudian, masuk Bang Duloh. Duduk di depan Bang Pendi.

Mpok Wati nyamperin Bang Pendi dan Bang Duloh.

“Mao makan ape nih niari..,”ujarnya.

“Ngomong-ngomong warung kenape rada sepi?” tanya Bang Pendi spontan.

Mpok Wati menunjuk ke poster lumayan gede yang dipasang di tembok deket Mpok Wati biasa ngeracik kudapan. Bang Pendi dan Bang Duloh ngeliat tu poster. Ehem.. “Yang mao muji-muji Ahok, mendingan di warung laen aje ye..,” bunyi tuh poster.

Bang Pendi dan Bang Duloh manggut-manggut.

“Kenape pake pasang posteri begitu segala?”

“Saye nggak demen, Bang Pendi..”

“Gak boleh begitu.. Kan ade nasihat Kyai.. Gak ape-ape dengerin ame ngomongin kebaekan orang yang kite kagak demen. Kite malah kudu sering-sering nginget yang kagak baek di dalem diri kite.”

“Nasehat Kyai kagak salah, Bang Pendi. Tapi, ape Ahok juga baek?”

“Kate temen-temen ame pendukungnye, die kagak ade tandingan kebaekannye..Makenye die berani ngomong, staf yang kagak becus kerja, buruan deh pade minggat mundurin diri,” samber Bang Duloh.

“Bang Duloh emangnye kagak paham? Itu kan cuman siasat aje, supaye stafnye kagak ade yang mundur. Dan.., kalo ade yang mundur masyarakat bakalan kontan nyangka, pasti staf yang kagak becus kerja.. Ntu ‘kan siasat model Puyi wakyu mao ngebangun lagi kerajaan Manchuria.”

“Ck ck ck.. kagak nyangke saye, Mpok Wati jauh ye ilmunye..,”cletuk Bang Pendi.

“Bang... biar begini-begini saye anak ustadzah Rojané.. Tahu kan, gimane emak saye? Kite jangan ketipu.. Ahok selalu pake siasat kayak begitu, supaya die terkesan selalu hebat dan bener.. Ape emang die ude bener?”

“Kate temen-temen yang kerja di Pemda DKI sih begitu, Mpo..,” sambung Bang Duloh.

“Pasti yang ngomong begitu.., cuman pegawai yang mikirin dirinye, Bang.. Ngelindungin gaji supaye asep dapur terus ngebul..”

“Segitunya, Mpok Wati...,”goda Bang Pendi sambil mesam-mesem.

“Ngomong-ngomong mao pesen ape? Buruan..”

“Saye semur daging ame semur permate bunda..”ujar Bang Pendi.

“Permate bunda-nye lagi kosong bang. Stok jengkol belon dateng dari Lebak ame Bogor.”

“Kalo gitu semur daging ame kentang aje deh..,”balas Bang Pendi.

“Bang Duloh ape?”

“Saye ketupat sayur ame kalio daging. Jangan lupa bakwan udang ame sambe limo..,”jawab bang Duloh.

Mpok Wati segera ke tempat meracik kudapan.

Gak berape lame, masuk Koh Aming. Die langsung duduk di samping Bang Duloh. Matenye melotot ngeliat poster Mpok Wati.

“Owe demen tuh poster.. Jangan kasih tempat deh orang-orang yang memuja Ahok gak pake ininye,”ujarnya sambil meletakkan telunjuk di kening.

“Emang banyak pemuja Ahok yang gak pake nalarnye?”samber bang Pendi.

“Ah.. Bang Pendi kayak gak pernah nonton tivi aja.. Gak usah disebutin, kita udah tahu siapa temen dan pendukung Ahok.. Ada cirinya..” ungkap Koh Aming.

“Ape tuh cirinye?” tanggap Bang Pendi.

“Kayak Ahok dah.. Pake emosi. Ngotot. Terus nyerocos gak punya etika. Gak sanggup dengerin orang ngeritik. Terus... mukanye nunjukin, kalo apa yang mereka omongkan gak sesuai dengan kenyataan. Cuman sekadar memuji dan membela,” jelas Koh Aming.

“Oooo... pantes.. Kalo ade talkshow ngomongin Ahok, ujung-ujungnye jadi debat kusir..,”sahut Bang Pendi.

“Pasti jadi debat kusir bang.. Soalnye mereka ude disetel kayak robot, yang baek cuman pujaannye..,”lanjut Koh Aming.

Mpok Wati mengantar kudapan pesanan Bang Pendi dan bang Duloh. Asistennye nganterin minumen: teh anget pandan.

“Koh Aming mo makan ape?”

“Yang biasa.. Nasi uduk, empal serondeng, sayur terubuk,”jawab Koh Aming.

Mpok Wati kembali ke tempatnye, ngeracik kudapan.

Bersamaan waktunye, sejumlah anak muda masuk ke warung. Lantas ngambil posisi di meja masing-masing. Mereka sempat membaca poster yang ditempel Mpok Wati.

“Kalo muji-muji yang selaen Ahok, boleh makan di sini, Pok?”

“Bole.. bole.. Tapi inget ye.. Mujinye musti masuk akal. Ade baeknye ade jeleknye. Terus jangan ngotot ngebelain idola..,”jawab Mpok Wati.

Asisten Mpok Wati mendekati anak-anak muda itu, untuk mencatat pesanan kudapan masing-masing. Mpok Wati berjalan ke dekat Koh Aming mengantar kudapan. Anak-anak muda itu terlihat menelepon teman mereka.

“Lu buruan ke sini nikh, ke warung Mpok Rojané.. Tapi jangan bawa begundalnye Ahok ye..,”ujar salah seorang di antara mereka. Bang Pendi, Bang Duloh, dan Koh Aming mesam mesem ngeliat tuh anak, yang rambutnye gondrong.. | Bang Sem