Ngandelin Permata Bunda

BANG IDRUS panas hati, gara-gara Yoyo dateng ke rumahnye. Gimane gak panas, kalo Yoyo bawa kabar burem soal Jamaludin yang belakangan rajin nongkrong di warung Mpok Rojané.

“Ngapain lagi kalo bukan mao ngerebut hati Mpok Wati, Bang..,”ungkap Yoyo. “Masa’ Bang Idrus kalah siak ame tu anak,” sambung Yoyo.

Muke Bang Idrus keliatan merah jambu klutuk.

“Mak Dikipe juga tuh anak,”umpatnya dalem hati. Bang Idrus gak berani ngucapin. Die musti nutupin suasane hatinye yang lagi kagak karuan.

“Ude berape hari di Jamal nyatronin Mpok Wati,”tanya Bang Idrus.

“Yah.. pas tempo hari ketemu Bang Idrus aje. Abis itu, tiap hari deh die nongol di warung. Biasanye abis lohor die ude nongol. Ntar nongol lagi abis asar. Terus pergi bentaran ke masjid. Abis maghrib ude nongkrong lagi di warung,” cerita Yoyo.

“Die lagi demenin Kholila kali?” balas Bang Idrus, rada ngehibur hati. Bang Idrus inget pantun Jamal, waktu die latihan Palang Pintu di pelataran warung. (Baca Juga: Amprokin Aje)

“Pan Kholila masih sekole di luar negeri, Bang. Lagian, Bang idrus pernah cerite, supaye Kholila diamprokin aje ame anaknye abang,” balas Yoyo.

Bang Idrus tambah yakin, Jamal ke warung Mpok Wati, lagi ambol hati pujaan hati Bang Idrus.

Spontan dia menyuruh Yoyo ke warung Mpok Wati.

“Lu pergi ke warung. Lu belagak makan ape kek di situ. Seole-ole lu jadi spion gitu,” perintah Bang Idrus.

Yoyo senang hati, karena Bang Idrus yang murah tangan, nyepengin duit lima puluh ribu. Yoyo kontan ninggalin Bang Idrus.

Di Warung Mpok Rojane milik Mpok Wati, keliatan idrus ude duduk di meja pojokan, yang biasa dipake Bang Idrus ngobrol ame Mpok Wati.

Lantaran pengunjung masih sepi, Mpok Wati duduk nemenin Jamal.

“Jadi lu beneran mao nyalonin jadi Gubernur DKI Jakarta, Mal?”

“Lah.. beneran pok. Masak saye maen-maen. Biar kagak punya duit, bukan doktor apelagi propesor, bukan juga tentara, saye kudu nyalonin diri jadi Gubernur,”jawab Jamal.

“Partai mane yang mao ngedukung lu?” balas Mpok Wati.

Jamal menggeleng. “Kemungkinan besar saye lewat jalur independen, Mpok..”ujarnya.

“Masih keburu lu ngumpulin KTP? Yang ngaku ude ngumpulin KTP sejuta aje ternyata bodong waktu diverifikasi,”balas Mpok Wati.

“Soal ntu, Mpok Wati kagak usah kuatir,”balas Jamal, sambil ngebuka ransel, yang di dalemnya penuh ame KTP aseli. “Mpok liat sendiri, pegang sendiri deh, asli ape palsu nikh.. Bukan fotocopy.. Pok,”seru Jamal.

Mpok Wati penasaran. Dia ambil KTP aseli seiketan. Mpok Wati kaget. “Gile lu ye Mal.. KTP aseli orang lu bawa-bawa.. Emang orangnye ude kagak perlu lagi?”tanya Mpok Wati.

“Orang yang ngasih nih KTP bilang ame saye.. Bang Jamal bawa nikh KTP buat keperluan nyalon jadi Gubernur. Saye rela, selame KTP dipegang Bang Jamal kite kagak ngurus-ngurus hal yang kudu pake KTP. Lagian, tuh KTP kan ude difoto-copy,”cerita Jamal.

“Bener.. bener lu ye Mal. Terus terang, gue kagum ame anak muda kayak lu..,”balas Mpok Wati. (Baca Juga : Kalo Nyak Jadi Gubernur)

Jamal terharu dengan omongan Mpok Wati. Die tatap mata Mpok Wati. “Mpok mao dukung Jamal juga kan?” tanya Jamal. Mpok Wati manggut. “Alhamdulillah... Kalo Mpok ude dukung Jamal, insya Allah dah.. Jamal makin mantep,”sambung Jamal.

Ketika itu, Yoyo masuk. Mpok Wati dan Jamal gak ngeh kalo ade orang masuk. Yoyo ngeliat, Jamal dan Mpok Wati saling pandang, terus tersenyum.

“Mpok setuju kan dampingin saye?”tanya Jamal.

“Gue setuju.. Gue bersedie jadi nomor dua..,”jawab Mpok Wati.

Jamal mengulurkan tangan, lalu berjabatan erat dengan Mpok Wati. Lantas die cium tangan Mpok Wati bolak-balik, kayak orang nyium tangan habib.

“Kalo gitu, Jamal perlu foto Mpok nikh.. Jamal mao bikin poster. Ntar foto jamal ame foto Mpok Wati ade di poster..” seru Jamal.

“Boleh Mal.. gue setuju aje..”

“Ngomong-ngomong Jamal boleh pinjem KTP mpok dong?”

“Jamal tunggu bentaran, gue masuk dulu ambil KTP gue..”ujar Mpok Wati, langsung masuk ke dalem rumah.

Semua itu dilihat Yoyo, yang kagak keliatan ame Jamal dan Mpok Wati, kehalangan tiang.

Yoyo buru-buru berdiri, sambil mindik-mindik ke luar warung. Keliatan die jalan semangat menuju rumah Bang Idrus.

Mpok Wati masuk lagi ke warung, memberikan KTP-nya kepada Jamal.

“Jadi Jamal ude boleh nyebut-nyebut nama Mpok dong ye..”tanya Jamal.

“Boleh.. boleh,”jawab Mpok Wati sambil manggut.

Jamal pamit. Dia meninggalkan warung. Mpok Wati melihat punggung jamal yang melintas di pintu. Berbarengan dengan itu, Koh Aming masuk ke warung bersama Bang Zul. Keduanya memilih meja dan kursi di pojokan laen. Mpok Wati nyamperin.

“Yang kayak biasa Pok.. Ketupat sayur, semur daging ama semur permata bunda,”pesan Koh Aming.

“Saye biasa juga. Nasi uduk, kalio daging, ame semur permata bunda. Dikit aje permata bundanye..,”pesan Bang Zul.

Semur Permata Bunda berbahan jengkol buatan Mpok Wati memang ngetop dan jadi menu andalan di warung Mpok Rojané.

Mpok Wati langsung ngeracik makanan yang dipesen Koh Aming dan Bang Zul.

“Koh Aming ude dapet informasi terbaru soal Pilkada DKI?”

“Udah.. Bekas Pangdam Jaya, Pak Sjafrie Sjamsoeddin ude bersedie tuh dicalonin maju jadi calon gubernur..” ungkap Koh Aming.

“Kayaknye Partai Gerindra ame Partai Demokrat ude mantep ngedukung tuh. Tapi, belakangan survey nunjukin popularitas dan elektabilitas Komjen Budi Waseso – Kepala BNN, melejit tuh.. PDIP kayaknye bakal dukung Buwas tuh..,”ujang Bang Zul.

“Saye pernah denger Buwas pengen pensiun sebagai polisi,” tanggap  Koh Aming.

Mpok Wati nganterin makanan pesenan Koh Aming dan Bang Zul. Terus duduk di meja sebelahnye.

“Kalo Sjafrie Sjamsoedin ame Buwas dicalonin jadi Gubernur DKI Jakarta, Mpok dukung siape?”

“Dukung Jamal”

“Jamal mane? Jamal anak Cipayung – Pasar Rebo,” balas Bang Zul kaget.

“Iye.. Saye salut ame tuh anak. Biar kagak punya ape-ape dan cuman sarjana teater doang, die berani maju. Kagak kayak anak Betawi laen. Jadi doktor, propesor, punya jabatan di pemerentahan, kagak punya nyali nyatain diri siap maju ke Pilkada DKI,” ungkap Mpok Wati.

Bang Zul dan Koh Aming kaget. Keduanya melongo sesaat denger ungkapan Mpok Wati.

“Tuh anak berani maju, diteminin ame siape?” tanya Bang Zul.

“Saye. Wati. Anak Mpok Rojane. Pernah jadi ustadzah, pernah belajar di Universitas Al Azhar – Kairo, janda beranak satu, dan masih keliatan seger..,”jawab Mpok Wati.

Lagi.. Bang Zul dan Koh Aming kaget.

“Jangan kaget Bang Zul, Koh Aming. Ntar kesambet berabe saye. Mendingan siap-siap jadi tim pendukung saye.”

“Soal dukung ngedukung, gampang.. Anti punya ape? Ape yang anti mao unggulin?” tanya Bang Zul.

“Bang Zul.. saye punya warung. Emang Bang Zul ame Koh Aming kagak nganggep Permata Bunda saye bukti keunggulan saye?” jawab Mpok Wati.

Bang Zul dan Koh Aming ngakak. Mpok Wati memandang keduanya serius. Mpok Wati cerita, gimane Permata Bunda olahan tangannya sendiri begitu terkenal.

“Permata Bunda yang Koh Aming ame Bang Zul makan ude bikin saye ngetop ke mane-mane ke seluruh Nusantara. Gara-gara tuh Permata Bunda, saye masuk koran, majalah, media online, televisi, dan jangan lupa.. radio berebut wawancara saye.,”ungkap Mpok Wati.

Koh Aming ame Bang Zul mesam mesem.

Percakapan mereka terputus, lantaran banyak pelanggan yang datang, sehingga warung dipenuhi pengunjung. Mereka, rata-rata nyebut Permata Bunda, setiap kali menyebut menu yang mereka pesan.

“Kagak salah tuh Wati.. Permata Bunda emang andalannye.. gara-gara permata Bunda juga, Bang Idrus tambah kesengsem ame die,” cetus  Bang Zul.

“Iya.. andalan warung. Mpok Wati becanda aja kali.. Masak maju Pilkada ngandelin Permata Bunda? Memangnya jengkol mau dijadiin menu utama warga?,” balas Koh Aming.

Di tempat lain.. Di rumah Bang Idrus, Yoyo lagi cerita menggebu soal Jamal dan Mpok Wati. Keliatan Bang Idrus cemburu binan. Kecemburuan serius yang nampak di wajahnya.. |